كل صاحب عمل عنده رأي في موقعه: هذا الزر صغير، والعنوان ما يوصّل الفكرة، والسعر لازم يكون فوق. الآراء ما تكلّف شي، بس ما تحلّ المشكلة. اختبار A/B هو الطريقة اللي تعرف فيها أي نسخة تجيب طلبات أكثر، بدون ما تراهن على تخمين.
الفكرة بسيطة: تعرض النسخة A على نص الزوار والنسخة B على النص الثاني، وتقارن رقم واحد واضح. ما تحتاج شهادة في الإحصاء، تحتاج انضباط في شنو تغيّر وشنو تقيس.
الاختبار يحط نسختين من نفس الصفحة قدّام زوار حقيقيين في نفس الوقت. النسخة A هي اللي عندك اليوم، والنسخة B هي التعديل اللي تبي تجربه: عنوان مختلف، فورم أقصر، سعر أوضح، زر واتساب أكبر.
ولأن النسختين تشتغلون مع بعض، يواجهون نفس الظروف: نفس الحملة، نفس زحمة نهاية الأسبوع، نفس الأخبار. الفرق الوحيد هو التعديل اللي سويته، وهذا يخلي الفرق في النتايج أوضح وتقدر تثق فيه أكثر.
اختبار ضعيف: خلنا نحسّن الصفحة الرئيسية. اختبار قوي: إذا رفعنا السعر فوق المواصفات، بيزيد عدد اللي يطلبون عرض سعر؟
اكتب السؤال قبل ما تلمس أي شي. السؤال الجيد يذكر التعديل والرقم اللي المفروض يتحرك. إذا ما قدرت تكمّل جملة «نتوقع هذا التعديل يزيد ___»، الاختبار مو جاهز.
إذا غيّرت العنوان والصورة ولون الزر بنفس الوقت وطلعت النتيجة أحسن، ما تعلمت شي تقريباً. ما تعرف أي تعديل سوّى الفرق، وما تقدر تعيد نفس النجاح على صفحة ثانية.
تعديل واحد، اختبار واحد، بعدها اللي بعده. تحسها بطيئة أول شهر، وبعدها تتراكم، لأن كل نتيجة تعطيك شي تعيد استخدامه.
اختر مقياس واحد يهم البزنس: طلبات مكتملة، طلبات عرض سعر، اتصالات، أو فورمات مرسلة. النقرات ومدة البقاء في الصفحة سهلة تتحرك وسهلة تنقرأ غلط.
حدّد الرقم قبل ما يبدأ الاختبار، وقاوم فكرة إنك تغيّره لرقم أحلى في النص. إذا الطلبات ما تحركت، الاختبار فشل، وهذي إجابة مفيدة مو أسبوع ضايع.
الاختبار اللي يمشي يومين يقيس يومين بس. زوار أيام الأسبوع غير عن نهاية الأسبوع، وأسبوع الراتب غير عن الأسبوع الهادي. خله أسبوع كامل على الأقل، ولا توقفه بدري لأن أول صباح طلع مشجّع.
خذ صفحة منتج وحدة، وسجّل عدد الزوار وعدد الطلبات اللي تجيها. بعدين غيّر شي واحد: رفع السعر وزر «اطلب على واتساب» فوق الوصف بدل تحته. خلّ النسختين أسبوعين، وقارن الطلبات المكتملة لكل مية زائر.
إذا النسخة B فازت، ثبّتها وجرّب الفكرة اللي بعدها على نفس الصفحة. وإذا خسرت، تكون نجيت من تعديل كان يبان واضح وهو مو واضح.
اكتب النتيجة بسطر واحد في ملف مشترك: شنو غيّرت، شنو صار، والتاريخ. بعد كم شهر يصير عندك قائمة قصيرة بشنو يتفاعل معه عملاؤك فعلاً، وهذي أنفع بكثير من اجتماع ثاني عن الذوق في التصميم.
Q8DM تبني برامج وتصمّم واجهات وتدرّب فرق في الكويت من 1998، والنمط اللي نشوفه في أغلب المشاريع واحد: المكاسب صغيرة، هادية، وقابلة للتكرار.
اختر صفحة وحدة، تعديل واحد، ورقم واحد. ابدأ هذا الأسبوع وشوف وين توصلك البيانات. زور q8dm.com وكلم فريقنا على شنو تبي تختبر أول.